Aghju sfrisgiatu l’acque di tanti è tanti mari
N’aghju vistu li porti, i veli è i vascelli
Aghju campatu a vita cum’un volu d’acelli
Aghju tastatu i venti i dolci è po l’amari
Aghju tuccatu e tarre, i paesi è cunfine
Aghju vulsutu tene in manu ogni stonda
Aghju vulsutu vede a stesa la più tonda
Viaghjà in u mondu senza pinsà à a fine
Aghju basgiatu labbri, sò statu innamuratu
Cunnisciutu aghju amori ancu tristezze è pene
Vuliu scopre tuttu senza guardà l’avvene
Aghju alzatu una casa cù u cantu muratu
Socu natu in un mondu di pace ancu di guerre
Aghju vulsutu fà d’una voce rinnova
Una canzona bella cù una rima nova
Di li mo ochji scuri, a tarra vogliu vede
Aghju sappiutu sempre ciò ch’ella hè a richezza
Di vultà n’u so nidu dop’à ogni partanza
Di ritruvà famiglia è cose d’impurtanza
Dop’à i pienti, i mughji, a gioia è a tristezza
Aghju cantatu a vita, aghju cantatu a morte
Aghju persu battaglie, aghju vintu un amore
Aghju coltu a passione cum’è pò esse un fiore
Aghju apartu i cori, aghju apartu e porte
Ne aghju fattu troppu, mi ne possu andà
Versu quelle alte sponde in u celu quallà
Aghju à cuntinuvà à dì è à cantà
Sin’a fine d’i tempi è di l’eternità
A.P.
21/07/2018
Portu
Aucun commentaire:
Enregistrer un commentaire