Bloggu ingiru à i puemi in lingua corsa d’Antoine Parodin. Mandate puru u vostru avvisu in cummenti ! Bon’ viaghju in issi sogni scritti !
dimanche 19 août 2018
Fumaccia
À mez’à a fumaccia di a so sigaretta
Ch’ella tene à a bocca, ch’ella tene in la manu
Vecu li so capelli, u so sguardu saetta
Chì d’un colpu in u corpu mi piglia è mi trapana
À mez’à a fumaccia di a so sigaretta
Vecu u ballu languente d’a so bella statura
Cum’è una luciola in a so pupilla stretta
T’hà l’ochji di liona di calore è fridura
À mez’à a fumaccia di a so sigaretta
Chì face cum’un nulu divinu nant’a dea
À a pelle chì luce d’u core prediletta
È volta è gira è balla, ciambotta a mo idea
À mez’à a fumaccia di a so sigaretta
Chì mi schjarisce l’ore dendu lu so luciore
In la me notte nera, tù bella ghjuvanetta
M’ai fattu campà u to più chjaru albore
Dammi di lu to focu pà accende la chjara
Sigaretta d’amore chì ti mostra a so fiara
Dammi di lu to focu per ùn più mai piegne
È riscaldassi un pocu d’amore ch’ùn si spegne
Antoine Parodin
Dumenica u 19 d’Aostu di u 2018
Portu
Inscription à :
Publier les commentaires (Atom)
Aucun commentaire:
Enregistrer un commentaire