Mea sè tù

Bella sè tù
Cum’è lu ghjornu in fiara
D’u mo « ti tengu cara »

Strana sè tù
Quandu lu ventu in festa
Sumena la timpesta

Cara sè tù
Da lu core cuntentu
À u basgiu accunsentu

Chjara sè tù
Cum’è un segnu d’alba
O un sole chì scialba

Core sè tù
Un solu batticore
È nunda n’ùn pò more

Cantu sè tù
Quellu d’alma maestra
Quand’apri a to finestra

Fiume sè tù
Chì corre in lu mio esse
Chì mi strughje è mi tesse

Focu sè tù
D’amore mai spintu
Di core mai strintu

Mea sè tù
Perchè cara ti tengu
È sempre t’appartengu

Mea sè tù...

Antoine Parodin
Luni u 2 d’Aprile di u 2018
Portu