mercredi 5 septembre 2018

L’omu è u mare


Era quì nant’u so scogliu
Fighjulendu a mane, a sera
U mare furiosu o d’ogliu
Sempre d’a stessa manera

Era quì in lu so portu
À carizzà i so pedi
Era lu so versu scioltu
Ùn cuntava mancu i pedi

Era un omu à u mare
Era un mare à un omu
Eranu duie alme chjare
Cù un stintu mai domu

Era quì nant’u so molu
Guardendu a stesa turchina
Dicendu : « ùn sò mai solu
Ci hè iss’onda quì vicina »



Era quì è po quallà ne
Tuccava ogni cuntinente
À timpesta, à sulane
Tinendu le sempre à mente

Era quì nant’u so scogliu
Era quì à fighjulà
Ma l’omu è u mare d’ogliu
Sò inseme in l’eternità

Culori di Van Gogh


Hè a pezza trista è muta è hè viota quella sedia
A natura hè zitta è muta pare una strana cumedia
Sott’i colpi d’u pinnellu si sveglia a ghjente in tarrazza
Sentu i mughji d’u zitellu è mancu un anghjulu passa

Daretu à la so tela si mira sempre ogni sole
Cù u chjaror’d’ogni stella face ballu u girasole
È l’alivi è e cicale accoglienu lu pittoru
S’arrizza lu naturale è si face tuttu d’oru

È da sta natura fata chì face ciò ch’eiu socu
Sò ind’un albore nati i culori di Van Gogh

Si pesa lu sole sopra à i prati veranili
È pudemu infine scopre e nove sponde d’aprile
U turchinu di l’assenza intigne lu paisaghju
Cù i lumi di sperenza di u veranu, di maghju

Si sparghjenu e volute in la notte d’a so alma
È e sciume assulute rimpiazzanu l’onda calma
Si sparghjenu ste spirale cù e so farfalle accese
Ghjunghje l’ora vispirale è li so dimonii intesi

Antoine Parodin

mardi 4 septembre 2018

Tutti ci sò


Rivecu sempre u mio scornu
In sta pezza accesa
D’a gran’ casa d’u paese
U ghjornu si pesa
Oghje ùn ci hè più nunda in fornu
Hè mutu tutt’u cuntornu
È n’ùn ci sò più

Rivecu sempre u carminu
U focu è e fiare
Cose ch’o tiniu care
Memoria fiumara
L’hà pigliati tutti tutti
Senza fanne manc’un fruttu
È n’ùn ci sò più

Rivecu e strette à a luce
Di u sole d’oru
Caldu caldu è m’innamoru
Di ‘ssi ochji tesoru
Turchini quant’è u mare
E so onde sempre chjare
È n’ùn ci sò più

Ma ci vecu una bandera
Sempre à svintulà
Chì dà voglia di cantà
À quelli d’avà
A ghjuventù ch’hà la brama
D’accende la torna a fiamma
È tutti ci sò

Chì dà voglia di luttà
Pà la nostra Corsica
È tutti ci sò

Antoine Parodin

Un monte in u mare


In l’albore quallà prufumata di machja
Hè natu à mez’u mare stu scogliu o stu monte
D’un sguardu chjaru è lindu carezza l’orizonte
È s’alza fieru è rittu u monte capimachja

Sta muntagna d’argentu in u Maritarraniu
Canta le so canzone à l’acellu chì vene
À truvà sta risorsa pà l’acillucci à vene
Di tempu sempre bellu, di tempu mai pagnu

A muntagna n’u mare
Chì stà sola sulella
À mezu à l’onde chjare
Ghjè la nostra isulella

A muntagna n’u mare
Chì stà zitta è ribella
À mezu à l’onde chjare
Hè nostr’isula bella

Alza e so cime sante è e so sarre appese
Cum’è per ringrazià u sole chì l’hà fatta
Fendu l’amore cù a sciuma è l’onda matta
Cusì sò nati i nostri li lochi è li paesi

E so calanche rosse i pedi tutti crosci
Abbraccianu per sempre u cor’ di lu marinu
È li rinaghji accesi cun estru cantarinu
Facenu u sirinatu à ogni fiume nostru

Antoine Parodin
Sabbatu u 25 d’Aostu di u 2018
Portu

Per avè u to amore


Girà tuttu u mondu sanu
Fatti vede u varanu
In un segnu di a manu
Per avè u to amore

Mustratti centu attrachjate
Dinò centu alburighjate
Pà e notte è matinate
Per avè lu to amore

Scrive nant’à ogni muru
È ogni celu più scuru
U to nome dolce è puru
Per avè lu to amore

Sunnià à l’ore belle
Ind’è l’ochji mette stelle
Abbraccià torna a to pelle
Per avè lu to amore

Ma par avellu più forte
Ùn mi ferma cà cantà
Cà stridà è mille volte
Cà scrive a mo vuluntà

Per avè lu to amore
Fariu n’importa chè
Andaraghju sin’à more
S’ella ti face piacè

Antoine Parodin
Luni u 3 di Sittembre di u 2018
Aiacciu

Notte di sognu


Hè calata pianu a notte
Nant’à a vechja cità
Ghjunghje l’ora di u sognu
Prestu s’hà da discità
Sopr’à e torre è u portu
Senza mancu suspirà

È t’aspettu impaziente
Com’è ogni sera torna
Aspettu in lu mio silenziu
A to voce chì ritorna
È i to capelli sciolti
O ventu chì parte è torna

À la luna splendurente
Sopr’à l’onde cristalline
Guardu u pagnu velu chì
Si sparghje nant’e culline
Ma ci sarà lu to lume
Da aspittà e mulline

Gira gira in lu mio capu
Cum’è una nannarella
A musica d’u to core
Chì m’accende ogni stella
È chì ribomba di più
Quand’a notte ci sfragela

Mi faci sente a to vita
Mi dai u to core in treccie
Cù e to parolle in focu
Sempre sempre cantareccie
Trà l’alburoni sfrundati
È di u sognu le leccie

Si finisce avà la notte
Cù le nostre sunniate
Scappi lesta ùn ti ritrovu
Trà tutt’e mo brame nate
Senza tè ùn pudaraghju
Gode e stonde è po l’annate

Antoine Parodin
Luni u 3 di Sittembre di u 2018
Aiacciu

Aviu sunniatu


Aviu sunniatu una sera, una notte
In lu vapore di u mare in bullore
À una donna chì cantava centu note
È l’avariu datu tutttu lu mio amore

Era bella è graziosa stu dolce fior’di stella
Ch’accindia per mè i s’ochji castagnini
À l’ora di u neru cantava a damicella
Strappendu mi l’affanu, tracciendu i mo camini

Vogliu parte cun tè, dorme sott’à la volta
À u chjaror’d’u celu, à e rabbie d’u mare
Vogliu cantà cun tè canzone di rivolta
È gode per u sempre e nostre l’ore chjare

Dapò sta seratina sentu sempre a to voce
A notte è a matina m’incanta è mi piglia
In stu ballu languente di rise à mezzovoce
È lu to visu caru m’innamora è spampiglia

Ma hè passata l’ora di stu sognu chì  corre
Ti cercu sempre avà trà e vele d’a mente
T’aghju persu ma ti truvaraghju o amore
E nostre stonde ùn saranu più mai spente

À l’albore nascente stocu quì penserosu
À l’ora chì u mondu in lettu sempre dorme
Ripensu à lu to core, stu core calurosu
È la to voce ch’in mè lascionu e so orme

Antoine Parodin
Marti u 4 di Sittembre di u 2018
Aiacciu