Pientu

In la stretta ùn ci hè più lume

Mi manca lu to prufume

U sole hè dighjà ciuttatu

Cercu u to visu fatatu

 

In celu manc’una stella

Socu solu o damicella 

Nant’u paese serenu

Scappatu hè l’arcu balenu

È po fermu in notte nera

Senza voce è senza spera

A to bocca hè un ricordu

Chì n’ùn semu più d’accordu

È tù chì ni voli andà

Madonna, chì possu fà ?

U core si n’hè andatu

Senza manc’un basgiu datu

In li to ochji

Ùn ci hè più nund’avà

Manc’una lacrima à sculà

In li mo ochji

Ci n’hè una

Chì dice a me sfurtuna

È tù chì oghje

Ti ne sè andata

À gode a vita libarata

Eiu chì oghje

Pienghjuleghju in vanu

Sè partuta luntanu

Antoine Parodin

Sabbatu u 18 d’Aostu di u 2018

Portu