Al di là

Al di là le nostre cunfine
Al di là d’u nostru mondu infidu
Al di là di tutte e nostre lite
Al di là di le nostre ferite
Ti ne stai quallà

Tù
In lu to celu immensu
À culore d’argentu
Noi
Ferma in core u visu
È u toiu u ramentu

Tù
In lu to paradisu
À mezu à l’anghjulelle
Noi
Aspittemu u surrisu
Chì falarà d’e stelle

Tù
Da sopr’à Cursichella
Curunnata di lume
Noi
Guardemu quell’acella
Chì frisgiuleghja e sciume

Tù
Ci guardi d’a finestra
Di lu to locu appesu
Noi
Pinsemu à tè suvente
U ricordu hè accesu

Tù
Godi l’eternità
À mez’à l’ortu santu
Noi
Per tè emu à cantà
Cù u nostru core frantu

Antoine Parodin
Marcuri l’8 d’Aostu di u 2018
Portu