Dopu avè pigliatu u chjassu
È a strada petricosa
Sbocchi in paese d’u Tassu
Ch’aspittava ùn sò parcosa
Ch’ellu ghjunghji lu to passu
À mezu à a machja ascosa
L’ai trova la to via
Da sott’à qualchi pullone
U frundame face umbria
À nant’à u muraglione
È u ventu cantarinu
L’impruviseghja canzone
U paese s’addurmenta
Focu mutu è fiara spenta
Ma u paese si move
In cerca di strade nove
Sò in manu d’u silenziu
E casuccie è a chjesola
Dop’à l’ultimu licenziu
U tempu fiume ci scola
O cum’u biotu hè immensu
O cum’a so tarra hè sola
I so tetti sò sfalati
In manu d’u lamaghjone
Cum’i so muri sfraiati
Ch’ùn cuntanu le staghjone
Soli soli abbandunati
Senza mancu una raghjone
Aucun commentaire:
Enregistrer un commentaire