I sguardi vani

Si sguassanu i culori à u me orizonte
Si mischjanu quallà in un fume di verde
Di’ssu stranu dicoru nunda ne vogliu perde
Parchè vecu a me vita, in 'sse cunfine tonte

I sguardi vani sò e cunfine
Luntanu à tè pianu ne vanu
Mai u viaghju ùn tocca fine
Sò e cunfine i sguardi vani

Si sguassanu le stelle à u meiu u celente
Una s’accende è l’altra in lu core sparisce
Nant’à u mare dolce à l’onde sempre lisce
Viaghju à core stesu cù u me passu lentu

I to bracci sò sponde, ed eiu m’alluntanu
Lasciu u me estru corre per le piaghje turchine
Ùn ti possu dì nulla chì l’ora s’avvicina
D’i dui sguardi persi in l’abbisse d’u vanu