Per i chjassi paisani
Risona un’ impruvisata
Sott’à alivi è castagni
È ch’hè prestu ribumbata
Eppo mi risona in capu
A voce di u Furcatu
Conta u tempu, i so stanti
È i guai è l’allegrie
Ind’è tutti li so canti
Sentu ste parolle vive
Eppo mi risona in capu
A voce di u Furcatu
Rivecu e casette grisgie
Di u paisolu d’Ota
U sole chì l’onde intisgia
Quandu in mare capiciotta
Eppo mi risona in capu
A voce di u Furcatu
Ogni albore spurgulatu
À nant’à i Trè Signori
A spelunca à u so latu
Duve cantanu i pastori
Eppo mi risona in capu
A voce di u Furcatu
U battellu ch’entre in portu
È e rise zitelline
I vichjetti in lu so ortu
Trà u verde è u turchinu
Eppo mi risona in capu
A voce di u Furcatu
Eppo mi risona in core
U so cantu ch’ùn pò more
Aucun commentaire:
Enregistrer un commentaire