Ochji eternità

In fondu d’i to ochji ci balla una spagnola
Quandu l’ora hè di focu nant’u so paisolu
Ci canta una chitarra d’accenti urientali
Chì sona chì a vita più cà u restu vale

In fondu d’i to ochji ci bagna una sirena
Azzinga à u mo core u to corpu di rena
Hè cum’un arinaghju duve vogliu accustà
In fine d’u viaghju da pudè mi agruttà

In fondu d’i to ochji ci vecu ancu un disertu
Ma ci vecu dinò un oasì offertu
À i sogni i più scemi e sperenze e più tonte
Quand’u me sole rossu si ciotta à l’orizonte

In fondu d’i to ochji vuleria annigà
E pene è l’allegrie, e partenze, i vultà
Ci vuleria gode cun tè a libertà
In una stonda pura tesse l’eternità...