I fragni

Cum’u tempu chì passa cù e so centu angoscie
Cum’a piove chì fala cù e so mille goccie
Cum’a vita chì và cù i so milli lagni
Faci girà senza piantà
Di u me core tutt’i fragni

Cum’un sole chì scappa quandu ghjunghje l’abbrocu
Cum’a memoria in core ci face lu so locu
Cum’a vita chì và cù i mumenti sani
Faci girà senza piantà
Di u me core tutt’i fragni

Cum’a luna d’argentu è so centu stelle
Cum’u calore dolce di a to bruna pelle
Cum’a vita chì và cù u so curteghju d’anni
Faci girà senza piantà
Di u me core tutt’i fragni

Cum’i so ochji cari à culor’ castagninu
Cum’u turchinu immensu di u mare divinu
Cum’a vita chì và cù i so centu danni
Faci girà senza piantà
Di u me core tutt’i fragni

Cum’u tempu macina e stonde è i ramenti
Cum’a fiura chì stà chjosa in e nostre menti
Cum’a vita chì và ch’ùn sguassa li m’affanni
Faci girà senza piantà
Di u me core tutt’i fragni

Antoine Parodin
Dumenica u 21 d’Uttobre di u 2018
Aiacciu