Sole sbuccitu

Eccu, un vechju portu
Un fiore in l’ortu chì sunnieghja
Eccu, una casetta
Una vichjetta chì a fideghja

È cum’un sole sbuccitu 
Un core inveranitu
Batte u calore umanu
È cum’una zitellina
In cor’di l’istatina
Chì ti porghje la manu

Eccu, ‘ssi monti fieri
I canti altieri d’una zitella
Eccu, un visu d’oru
Cum’un tesoru o una stella

Eccu, un chjassu celu
Un riturnellu, versu briacu
Eccu, una lumera
Tal’una spera, versu tè vacu

Ùn facciu ch’è passà

In ogni stonda pagna è in ogni sulana
Per l’ochji di u mare è i to sguardi puri
Per a vita chì tesse i tempi è e primure
È per i ghjorni scemi ch’in lu me core vanu

Per ogni strada nova chì s’apre in a bughjura
Per a manu ch’aiuta è l’alma ch’assulleva
I penseri è i danni per ch’ella campi a leva
Senza rimorsi amari è vechje mucature

Per u zitellu natu, figliolu di sta tarra
U so ochju arrimbatu à u locu ch’accoglie
U so passu d’avvene chì a nuttata coglie
È face spuntà l’alba d’amore senza para

Ùn facciu ch’è passà, sò cum’un’ ombra in l’aria
Chì vola à l’orizonte sopr’à u mo paese
Cantu per ciò chì hè, pè sti sogni difesi
È per l’idea nova chì piglia è chì viaghja

U pocu in l’infinitu

Per i to ochji, tuccaraghju le stelle
Rimiraraghju u celu è a mane è a sera
Per i to ochji, circaraghju la luna
Da buscà a furtuna à mez’à i penseri

Per i to ochji, accindaraghju u lume
Faraghju corre à fiume e rime d’e canzone
Per i to ochji, invintaraghju centu
Paesi è cuntinenti sbandati di ragione

È pruvaraghju à esse a tarra d’i to passi
A petra d’i to chjassi à l’orli d’a to vita
È pruvaraghju à esse a tarra d’i to passi
A petra d’i to chjassi, u pocu in l’infinitu

Per i to ochji un distinu supranu
Ci porghjerà la manu da scappà al di là
Per i to ochji u to sguardu funtana
Chì face a ninni nanna ancu à l’immensità

Per i to ochji, affularaghju e spere
Longu à e to custere di pelle imbalsamata
Per i to ochji, scrivaraghju u futuru
Di tutt’e mo primure cun tè a me amata

Avvedeci o passione

Avvedeci o passione
D’una siconda vana
Chì teni u mondu sanu
À l’orlu d’i to bracci

Avvedeci o passione
Chì quandu faci un passu
Ùn trovu più lu chjassu
Chì d’un trattu mi lasci

Avvedeci o passione
O addiu ùn a sò
Tù chì franchi a ragione
Tù chì apri e prigiò
È cum’un zitellone
Briacu di canzone
A mo vita ti dò
Avvedeci o passione
O à prestu, ùn a sò

Avvedeci o passione
Di l’ochji à sguardi immensi
Ùn sò ciò ch’è tù pensi
Per quale u core batte

Avvedeci o passione
Di e prime attrachjate
L’ultime batachjate
È d’ogni basgiu fattu

È spessu...

È spessu mi vultavi cum’una fiura antica
Da truvà li mo passi quand’a sperenza trica
Versu la to lumera, un sole chì camina
È l’ora d’u vultà paria più vicina

Una à una e to stonde à e meie addunite
Anu trovu a so strada à mez’à ghjente infide
È l’oru di u ghjornu da noi scumpartutu
Hà impannatu di rise u ricordu partutu

È spessu mi vultavi à l’orli d’i silenzii
D’i sogni smisurati è di i celi immensi
È a to voce pura strappava u malistà
Per apre centu porte, appruntà si à andà

Una à una e to stonde, solchi d’eternità
Nutrisceranu i versi d’un cantu chì sarà
A sumente matura d’avvene à custruì
Da mustrà chì stu fiore pò sbuccià ancu quì

I santi silenziosi

I santi silenziosi d’e nostre ghjesgie antiche
Ci contanu e mimorie d’un altru tempu andatu
Cum’è sò corse l’ore nant’à quelle vistiche
Da tante le sciagure è lu sudore datu

Feghjanu li paesi sott’à i lamaghjoni
Ùn sanu più chì stonda li farà vede u ghjornu
Speranu in l’accolta in grentu à ‘ssi rughjoni
Ma mancu i ghjuvanotti ùn ci anu à fà ritornu

I santi silenziosi in cima di l’altare
Ci volenu stà torna per ùn lascià a piazza
À quelli di cimentu chì vestanu e mo tarre
Cù u putere forse ma una mente pazza

Mughjaranu à i celi, prigaranu à Ghjesù
E bandere d’amore saranu a risistenza
Chjamaranu d’un cantu arrittu a ghjuventù
Chì francarà la machja da sparghje a so spirenza

À visticà i tempi di i mei partuti
Ci truvaraghju e stonde d’una vita spartuta
À visticà i tempi al di là di a notte
Ci truvaraghju e stonde d’una vita di lotte

Cum’un cantu di sperenza

Cum’un cantu di sperenza
Vene à intisgià a notte
In un raghju novu è puru
Chì t’apre tutte le porte

Cum’un cantu di sperenza
L’acellu chì volta à u nidu
A to vita in lu so locu
Di un amore u più fidu

Cum’un cantu di sperenza
Chì si pesa è ci disceta
Dui versi in ogni core
Cù u so fiatu pueta

Cum’un cantu di sperenza
Una strada à seguidà
Chì ci chjama à fratellenza
Per tutta l’umanità

Cum’un cantu di sperenza
Ch’in ogni pettu risona
À l’ora d’u svegliu umanu
Ribomba a nostra canzona

Cum’un cantu di sperenza
Vene à intisgià la notte
Quandu l’umanu d’arrizza
Ch’ellu crede in e so lotte

Cum’un cantu di sperenza
Chì ci hà da scambià la sorte...

L’ore aparte

I to ricordi accumbracciati
À i to sogni à inventà
È ‘ssi surrisi innamurati
À coglie un altru duvintà

Hè a to vita chì ci corre
Nant’à lu grande è bellu andà
È pocu t’impremmenu l’ore
S’elle ti facenu vultà

T’aspetteranu l’ore aparte 
À l’orli di u to campà
Camparè e stonde d’u parte
Ti faranu dinò vultà

In core splendenu i ghjorni
Ancu s’ella piglia l’età
È e partenze è i ritorni
Anu sulcatu u to sperà

Ma a to voce di rinnovi
Hà sempre un versu per andà
È ciò ch’è tù perdi, u ritrovi
Vicinu à ‘ssu tempu chì và

Scala di l’ore

S’elle ti sò mute e voce
À lu cor’ di l’annuttà
A mo chjama più feroce
Pianu puderà cullà
Versu u to balcone mondu
È u to lettu à girà
In u mumentu giucondu
Di e stelle à spampillà

Tandu, s’è a notte cala
Nimu po ci senterà
È francaremu ‘ssa scala
S’ancu tù a voli fà

S’ellu stà chetu l’acellu
È a luna da quallà
Apremi u to purtellu
Cun tè vogliu sunnià
Cum’è quand’eru un zitellu
Sempre in brama di scappà
In lu me sognu ribellu
S’ellu mi vole piglià

Riturnellu

S’ella si tace a funtana
Di e to rise à incantà
A pena sarà luntana
È ma’ più ci hà da truvà
In a nostra furterezza
Ci pudaremu agruttà
Trà i basgi è a carezza
Chì sol’ tù mi sai dà

Lasciammi tù

I surrisi ch’è tù lasci
U tempu i ti renderà
Ti manderà centu basgi
Nant’a strada di l’età
Piglia in manu u to distinu
Fallu di fraternità
È ingranda u to caminu
Per a leva chì sarà

Lasciammi tù
Un frisgiu di veranu
Una strinta di manu
U stintu è a virtù

Lasciammi tù
A spera fresca è sana
Chì corre in a funtana
Di a to ghjuventù

I silenzii ch’è tù lasci
Tante tristezze à scurdà
Devi scambià in abbracci
Eppo lascià ti purtà
Chì a vita hè fatta à scali
Trà u parte è u vultà
Colla una à una e scale
Cù lu to passu chì và

Riturnellu

È ‘ssu amore ch’è tù lasci
Ch’è tù campi sempre avà
A malincunia scaccia
Eppo ti face avanzà
Cusì l’oru di i ghjorni
Ti pudarà impannà
Da accende tutt’i forni
Di a nostra l’unità

Di più ?

Faraghju sogni d’a to pelle
À l’ora ch’ella splende a luna
Sopr’à la passione cumuna
Ridente in li to ochji stelle
Faraghju mondi d’i to basgi
Eppo arcane citatelle
Di e to pinsate zitelle
Chì sempre mi mandanu raggi

Faraghju vite d’issi abbracci
À cori liati è immensi
Mi diciarè ciò ch’è tù pensi
Addurmintata in li me bracci
Faraghju strade d’e sunate
Da viaghjà à mezu a notte
Quandu tale un sole ti ciotti
Attempu à e nostr’abbrucate

Faraghju sole d’u calore
Ch’è tù mi mandi in un surrisu
Da fà ch’u nostru paradisu
Sia di dulcezza è d’amore
Faraghju pratu stesu è tamantu
Di u to corpu, anche fiurite
È curaraghju e to ferite
Stampendu in core quellu cantu

Ma cosa possu fà di più ?
Di tè chì sè ‘ssa puesia
A me voce, a me ghjuventù
È a mo vita chì s’avvia

E teppe silenziose

E teppe silenziose d’i ricordi d’inguernu
Mi sò tante canzone stampate in u quaternu
È tante rise nove à i mo sogni antichi
È tante citatelle di u tempu nimiche

Mi sò tante cunfine è tanti mondi à apre
Una vita, un surrisu à nant’à le to labbre
È un focu d’amore è di felicità
À mez’à lochi nostri chì sò sempre à truvà

Mi sò strisce di nuli sopr’u mo isulone
Duve fiurisce torna l’albore chì ci pone
U so basgiu di lume, furtuna è tenerezza
Ch’ùn hè mai listessu, cum’è l’ora ci svezza

E teppe silenziose d’i ricordi d’inguernu
Mi lascianu una stampa al di là di l’eternu
È possu rispirà libaru d’ogni male
È u mo sognu mondu pò sparghje le so ale

À u ventu...

Sò passate le stagione
À l’ochji colmi di stelle
Aghju intesu e so canzone
Da u meiu u purtellu

À u sole d’u to sguardu
U calore d’a to pelle
U marosu castagninu
Di l’onda d’i to capelli

Una voce cristallina
Ribomba pè lu mo esse
Una chitarra argentina
E mo notte tesse tesse

È u to visu m’accende
Fendu cresce a mo passione
Sò guarrite e mo vicende
Quandu mi porti attinzione

Ti sbalancu la mo porta
S’è tù voli vene è entre
Ci staremu sott’à volta
U nostr’amore à u ventu...

30/04/2019

À i to ochji...

S’ellu era u mo amore ch’o vidiu scappà
O s’ellu era u fiore di la mo ghjuventù
È ‘ssu stranu furore ch’ùn mi vole lascià
A brama d’un avvene inseme eo è tù

S’ellu era u mo amore ch’o sentiu pichjà
In fondu à lu mo core colmu d’u to suspiru
Dimmi s’è a to voce corre sempre quallà
Ch’o senti torna appena u to dolce rispiru

S’ellu era u mo amore ch’o sentiu chjamà
In u pozzu tamantu di e rise chì vanu
Si perde lu mo cantu, di vulè troppu amà
‘Ssu surrisu d’argentu, ‘ssa striscia di varanu

S’ellu era u mo amore ch’o vuliu piattà
Chì solu si palesa davant’à l’ochju umanu
S’ellu era una passione, un fiatu immensità
Chì brama di piglià è a vita è a manu

S’ellu era u nostru amore ch’o vuliamu sparte
Eiu è tè o tisoru per le strade e più belle
Ti dò a mo prumessa à penna è rima aparte
D’esse ci sempre fidu à i to ochji, a to pelle...

I to mondi d’oru

Quand’eru ghjuvanottu l’ochji persi in e stelle
D’un celente pueta, d’una canzona luna
T’aviu scontru bella, è cara damicella
M’ai azzingatu prestu à a toia a funa

D’un surrisu battellu quallà m’ai purtatu
Per l’uceani mari d’i to ochji prufondi
Ùn ci pinsavu più à dumane o passatu
Solu à u presente cuntavanu e mo stonde

Mi hè parsu ch’u mo versu senza u toiu era viotu
Chì e toie e parolle à e meie intricciate
A pudianu fà girà sempre a rota
Di un mulinu persu al di là di l’annate

I nostri basgi inchjostru dolce di e mo notte
Anu invintatu a voce d’issa nova canzona
Da ditti u mo vulè, a brama ch’ellu ùn ciotti
U sole è u m’amore nu a to pelle si pone

Sò sempre un ghjuvanottu, l’ochji in e stesse stelle
È tù o damicella, d’e mo ore cumpagna
S’o pudia vulà, vucaraghju in lu celu
Sopr’i to mondi d’oru duve nimu si lagna

Sicondu l’estru...

Ti vuleria scrive u turchinu d’i ghjorni
U rossu d’e to labbre, u focu d’u to core
Ti vuleria scrive millaie di canzone
À fiancu à li to versi è colme d’u m’amore

Ma u mo esse hè viotu è u me core in pezzi
Chere a to voce andata fanale d’i me passi
U to surrisu amatu di biancore è purezza
Torna in la mo mimoria ancu s’u tempu passa

À fiancu à tè e mandu e mo sperenze ventu
Ch’elle portinu à tè tuttu ciò ch’è n’ùn aghju
Ch’elle caccinu e larme, e sciagure è i pienti
Per datti ancu di più a forza è u curaghju

È cum’è fior’ di neve chì dopu à esse natu
Sparisce da u sguardu è versu tè viaghja
U to estru rinnovu à u meu rinatu
Andaranu à vulà sopr’à a Falcunaghja...

Vultà

Ti vulia custruisce
Un battellu à mare indà
Per falle appena fiurisce
E stonde d’u viaghjà
Per andà à scopre u mondu
Fattu à albe è abbrugà
È vede i soli à l’intondu
Sulchendu l’immensità

Ùn risponde mai innò
À a chjama à viaghjà 
Ma fà ch’un’ altra staghjò
Sempre ti fia vultà

Ti vulia insignà strade
Chì più nimu oghje ùn sà
Dà ti d’a ragiò e chjave
Per u toiu u duvintà
Dà ti u portu u più luntanu
S’è tù vulii accustà
Una bussula in manu
Per sapè induve andà

Avà ch’è tù sai tuttu
Di u parte è u vultà
À i toi dà u fruttu
Raccoltu quì è quallà
Dì li chì per esse omu
Ciole brama di pruvà
È ùn firmà mai domu
Da li mari à scatinà

Induvinà

Induvinà u tempu chì ti basgia infrebbatu
Nant’à i mari scemi d’e stonde è di l’annate
Chì ti bagna d’argentu cum’ella fasce a luna
U capu rittu è fieru d’issi amori cumuni

Induvinà e rise di u ventu in i campi
Amparà vita è stantu, tuttu ciò chì si campa
In l’ochji d’una bruna o quelli d’una bionda
Vede u chjar’di a luna o un sole giucondu

Induvinà i pienti chì spessu sò ascosi
Daretu u velu pagnu di tante è tante cose
Sapè chì ci hè un sole daretu ogni timpesta
È ch’una lacrimuccia si pò turnà in festa

Induvinà u passu ch’è noi piglieremu
Induvinà u chjassu duve noi andaremu
Circà u tempu bellu daretu à ogni nulu
Nanzu ch’u nostru tempu cù noi parti in pula

Un’ ultima volta

U to ultimu filare
L’ai stampatu in quaternu
Era cum’appesu à l’aria
À sfrisgià u celu eternu
Po s’era lampatu in mare
U to ultimu filare

L’ai scrittu d’a to manu
Fattu cum’un tistamentu
À lascià ‘ssa striscia vana
Da un core in u turmentu
Trimulendu i lindumani
L’ai scrittu d’a to manu

Viaghji un’ ultima volta
Al di là d’u to campà
Sbalanchi l’ultima porta
Ch’ùn sai più cosa fà

U to versu sgalabbatu
Si ne vola eppo si cansa
Si ne vola à u to latu
Di stelle ci hè una mansa
À cantà di mezu fiatu
U to versu sgalabbatu

Voli andà al di la notte
Duve u tempu ùn ti cunnosce
Scopre ti mille altre sorte
Mille gioie è mille voce
Duve u sole si ciotta
Voli andà al di la notte

Viaghji un’ ultima volta
Al di là d’u to campà
Sbalanchi l’ultima porta
Ch’ùn sai più cosa fà

Di u nostru amore

Sò passate e settimane
È ùn l’aghju viste corre
Avà sò secche e funtane
Di lu nostru amore

Sò scappati i mesi puri
Ùn ci ferma cà rimore
I mumenti oghje sò scuri
Di lu nostru amore

Cosa firmarà di lu nostru amore ?
Una lacrima chì và
O una canzona in core ?

Emu lasciatu e sperenze
Si ritrovanu avà sole
À mè fermanu l’assenze
Di lu nostru amore

È a suffrenza ci hà corsu
Cù i ghjorni à strappà l’ore
Oghje u tempu hè bellu scorsu
Di lu nostru amore

Una speranza

Di e mille battaglie ne tengu un’ amarezza
Eppo centu vicende à mezu à la me sorte
Aghju vistu l’infernu aghju scuntratu a morte
Senza una manu à tene è senza una carezza

À mezu à dolu è sangue, a cianga è a fulena
Quantu volte aghju persu un amicu sinceru
In un frombu terrore chì strughje lu penseru
È ci face scurdà ogni ora serena

Vistuti di turchinu cum’è l’ochji d’u mare
Ch’o vogliu ritruvà s’è Diu mi dà forza
Per resiste à ‘ssa guerra è turnà in tarra corsa
Abbandunati semu in quelle stonde amare

Ci sò sempre suldati nant’u campu distruttu
Forse ch’un ghjornu quì ci splenderà l’amore
S’è l’omu u più feroce ci vene à piantà un fiore
Prighendu per a pace è l’avvene di fruttu

Di e mille battaglie ne tengu una sperenza
Di vede i mo figlioli ingrandà pari pari
Luntani da i fochi state voi i me cari
Chì vi darà ferite è firmarà l’assenza

Ùn ci hè più omi

U sole ciuttava quallà
È u fighjavamu passà
Cum’è strintu in un benistà
Chì nimu ùn pudia capisce

Senza tè a vita era nulla
Chì u tempu à pasponi spula
Riduce tuttu pianu in pula
Ellu solu pò cummandà

Ùn ci hè più omi ind’issu mondu
È più nisunu ùn gira tondu

I basgi nostri scatinati
Cum’è un fiatu à l’alba nati
Nant’à i mo sogni chjinati
Chì t’aspittavanu à campà

Ma tù pigliata da u screnu
Di una vita di sirenu
Lasci u to sole lenu lenu
Spegne si in cor’d’u to andà

Ùn ci hè più omi ind’issu mondu
È più nisunu ùn gira tondu

A mo finestra hè chjosa chjosa
Lasciendu a camara bughjosa
In aspittera d’ùn sò cosa
Una presenza chì mancava

È u mo core ancu ellu hè spentu
Di pettu à tamantu turmentu
In più nunda à u fora ùn sentu
Più a to voce chì chjamava

Ùn ci hè più omi ind’issu mondu
È più nisunu ùn gira tondu

For’ di ragiò

L’aspittarè ‘ssi ghjorni cum’u tempu chì torna
Invadisce u to sguardu è annega i to ghjorni
Ùn ti truvarè nunda da unnisce ‘sse rive
È ti firmarà solu scrive scrive eppo scrive

Scrive a matina pura nant’à u to quaternu
A strinta a più sincera di a manu fraterna
U frascheghju d’argentu nant’à a to nuttata
E centu stonde sperse d’a vita sunniata

Scrive senza piantà, senza cuntà ne l’ore
Ùn sapè a stagione ne u tempu d’u fora
Scrive cum’è tù campi di tristezza è di gioia
Strappà tutt’e cunfine chì ci stalla l’annoiu

U to ricordu amatu ch’in l’aria pianu balla
U nostru amore rè chì piglia le so ale
Po si lampa in u celu da a cima d’u monte
È u to cantu apertu ch’abbraccia l’orizonte

È tandu a to scrittura ùn trova più a strada
Sè viota d’ogni sensu, d’ogni penseru in fiara
Chì ai datu tuttu, cum’è ciò ch’o ti dò
Fora d’ogni turmentu è for’ d’ogni ragiò

Cantu per tè chì sè partuta

In l’aria pura d’i mo anni
In lu so stranu passa è veni
Duve sò i ghjorni sereni
Duve sò i to lindumani
À piglià u core è e mani
In l’aria pura d’i mo anni

E mo paure sò svanite
Quandu m’ascondu è mi rifughju
In li to bracci, lasciu u bughju
Di l’amarezze è d’e ferite
Quandu ‘sse stonde sò finite
E mo paure sò svanite

Luntanu u sentu u so rumore
A mandulina à trimulella
Batte in lu pettu di l’acella
U core chì chere l’amore
Senza l’angoscia è u timore
Luntanu u sentu u so rumore

Cantu per tè chì sè partuta
Al di là d’e mille cunfine
Duve u ghjornu ùn tocca fine
È a tristezza si stà muta
Ùn trovu più l’ora vulsuta
Cantu per tè chì sè partuta

È i ghjorni si ne vanu...

À u ventu d’autunnu
Tramindui nant’a rena
L’altra face un segnu à l’unu
Chì li manda un basgiu lenu
Ingiru ùn ci hè più nisunu

Inciapanneghja u so mondu
L’attrachjata d’a passione
Scambia i culori à l’intondu
È li dà nove canzone
À u ventu vagabondu

U ghjuvanottu incantatu
Da la bella ghjuvanotta
Chì si trova u so latu
Scorda u sole chì si ciotta
D’un ultimu raghju natu

I so gesti sò impricisi
È hè scarsa a so parolla
Si mandanu i so surrisi
 Ma qualcosa hè strintu in gola
I sintimenti indicisi

Quale a pigliarà in manu
Quella nova decisione
Ma guardanu u luntanu
Sicuri di quelli unione
È i ghjorni si ne vanu...

Turnà cun tè

Turnà cun tè ‘ssa sera dopu à a briachina
Purtà ti in casa nostra à l’ascosu ind’u lettu
Chì batte à più pudè u core in u mo pettu
D’avè ti à u mo latu, più ch’è mai vicina
In ’ssa vita ch’aspettu

Turnà cun tè ‘ssa sera scurdendu u mondu  interu
Abbracciendu si torna in faccia à l’uceanu
Strigne ti in li me bracci po piglia ti la manu
Tene in mente è in core un solu amore veru
Invintà un veranu

Turnà cun tè ‘ssa sera, unnisce e nostre labbre
Da fà un paradisu à mezu à ogni guai
Beie à e to funtane ch’ùn si stancenu mai
A gioia è a certezza di un fiore chì s’apre
È andà duve sai

Turnà cun tè ‘ssa sera à sfrisgià ogni celu
À custruì u locu, unu d’issi rifughji
Induve omu si perde à mezu i mari muti
Fà d’a to barca sola un immensu vascellu
I nostri pienti asciuti

Mezanotte

Mezanotte è semu in piazza
Sò sarrate tutt’e porte
Mezanotte, u tempu passa
Ci strignemu e mani forte

Mezanotte, eiu t‘abbracciu
Sott’à un tettu di stelle
Mezanotte, u core in stracciu
Brama sempre la to pelle

Mezanotte in lu paese
Ùn si sente più nisunu
Mezanotte, e strette accese
Più ch’elle mai n’ùn funu

Mezanotte, contru à mè ne
Scordi ogni tristezza d’eri
Mezanotte, un fiore à tene
À u futuru, i penseri

Mezanotte, eiu t’aspettu
Cum’è l’alba ch’hà da nasce
È digià mi batte in pettu
A passione chì ti fasce

È prega

Una ghjesgia abbandunata
Una croce è un altare
Una chjama sbunurata
Di campane per ‘sse tarre

Po ci sò issi ghjuvanotti
Ci n’hè una trà di elli
Chì si piatta i so capelli
Eppo si mette in ghjinochji
Colmi à lacrime i so ochji

È prega, è prega, è prega

E so mani riunite
Per implurà lu so diu
Di dà torna à quelle vite
Un estru per esse vivu

Ma nisunu ùn vole sente
Sò partuti i ghjuvanotti
Colmi à lacrime i so ochji
E so brame si sò spente
Per un avvene ridente

Ma prega, ma prega, ma prega

È prega per i soi, è per u mondu sanu
À tutt’issi figlioli li vole porghje manu
È prega per i soi, è per u mondu sanu
À tutt’issi figlioli di un mondu inumanu

À quella vita

Ùn cunnoscu più paure
Ùn cunnoscu più affanni
Ùn aghju più stonde scure
Approntu i mo lindumani
À fiancu à tè o cara
A vita ùn hè più para

Un basgiu è tuttu cambia
U mondu è i culori
Hè di sirenu l’ambiu
N’ùn ci n’hè più dulori
À fiancu à tè o cara
A vita ùn hè più para

Ùn hè più para à quella
Ch’aviu senza tè
Senza li to capelli 
Senza i nostri piacè
Oghje sò innamuratu 
O cara a sai bè
À fiancu à tè a vita
Pare cosa infinita

In grentu à li mo bracci
Ti tengu è ti ritengu
Ti mandu centu basgi
Da dì chì t’appartengu
À fiancu à tè o cara
A vita ùn hè più para

Campemu u muvimentu
D’i nostri corpi sfiere
À u rilogiu tempu
D’isse passione fiere
À fiancu à tè o cara
A vita ùn hè più para

Ochji eternità

In fondu d’i to ochji ci balla una spagnola
Quandu l’ora hè di focu nant’u so paisolu
Ci canta una chitarra d’accenti urientali
Chì sona chì a vita più cà u restu vale

In fondu d’i to ochji ci bagna una sirena
Azzinga à u mo core u to corpu di rena
Hè cum’un arinaghju duve vogliu accustà
In fine d’u viaghju da pudè mi agruttà

In fondu d’i to ochji ci vecu ancu un disertu
Ma ci vecu dinò un oasì offertu
À i sogni i più scemi e sperenze e più tonte
Quand’u me sole rossu si ciotta à l’orizonte

In fondu d’i to ochji vuleria annigà
E pene è l’allegrie, e partenze, i vultà
Ci vuleria gode cun tè a libertà
In una stonda pura tesse l’eternità...

U pittore

U mo castellu di notte
Si sfonda sott’à l’assaltu
Di l’anghjuli di a morte
Da u celu u più altu

L’alba vole esse regina
Per pudè pianu sguassà
A sunniata turchina
Chì ci nasce d’anuttà

Duve hè a principessa ?
Duve sarà u so visu ?
A mo vita ùn hè listessa
Ùn pare più paradisu

Ditemi s’è a videte
A cercu in fondu d’a mente
Ma e maghjine sò chete
È di nunda ùn mi ramentu

U mo castellu di notte
Fattu di petre di luna
Hà lasciatu chjose e porte
Per ùn lascià entre u lume

Una à una in u celente
Pianu s’hè spinta ogni stella
È svegliatu à core spentu
Hè sempre viota a mo tela

Induve

Induve corre u tempu
È nasce lu mo versu
In un trattu di ventu
Da sopr’à l’universu
À e più alte cime
Di canzone è di rime

Induve more u ghjornu
D’amore à u luntanu
Induve ellu ritorna
Quandu sbuccia la mane
Cum’un fiore d’aprile
À prufumate file

Induve cansa a vita
È si face un arretta
In la stonda infinita
Di piacè chì stà cheta
Cum’un sicretu ascosu
Ind’è un novu chjosu

Induve cantu spessu
Per tè o la me dea
Induve canti tù
È svegli u mo diseu
Induve u mondu hè nostru
È u mare hè d’inchjostru

À e funtane

Hè quandu l’altrò ti chjama
Ch’è tù brami u to paese
Un anticu fundamentu
Per e to sperenze accese

Hè quandu l’altrò ti chjama
Ch’è tù cerchi un altru scalu
Un portu d’acqua ridente
È un novu celu chjaru
È un novu celu chjaru

Cambiarè forse dumane
Di camini per andà
Ma ritorna à e funtane
Chì t’anu vistu ingrandà

Hè quandu l’altrò ti chjama
Ch’è tù brami una casuccia
Quella d’a to ghjuventù
Chì cum’è un sole sbuccia

Hè quandu l’altrò ti chjama
Ch’una pagina hè à scrive
Un altru librone à apre
Sguassà e cunfine, e rive
Sguassà e cunfine, e rive

Nunda di più

Nunda di più mi pò cunvene
Ch’è di firmà à lu to latu
È di fà quì lu me avvene
Sott’u to celu spurgulatu

Mi bastanu e to sponde da pudè sunnià
À centu mille stonde perse in lu mo pinsà
Mi bastanu e to case da pudè mi agruttà
È tene la mo piazza in lu mondu d’avà

Mi bastanu e to rise da pudè mi invintà
Un mondu paradisu di gioia à vuluntà
Mi bastanu i to chjassi da pudè ci andà
È pone li mo passi per parte è viaghjà

Mi bastanu e to albe da pudè rinnuvà
U fiatu chì ti chjama è t’aiuta à luttà
Mi bastanu i to ghjorni da pudè li salvà
I mo cari cuntorni di partenze è vultà

Sò lochi

Lochi di pienti è di fulena
Di chjassi è di paesi anziani
Ch’anu tenutu testa à l’anni
Cù u so passu à briglia lena

Lochi di sciagure è di stanti
Di muragliette è di pascure
Chì sò u cor’di li me canti
È sò le mo sole primure

Lochi di marine è di scali
O muntagnoli in lamaghjoni
Di boschi, fureste, è pratali
È di casuccie in li machjoni

Lochi di tamanti abbandoni
Di scarti immensi trà e ghjente
Fatti à stradelle cù stradoni
D’indiature è fede ardente

Sò lochi nostri è mei, scorni di benistà
Cum’è tarre udissee chì chjamanu à campà
Sò lochi nostri è mei, chì faranu un’ andà
E surghjente d’idee per u to duvintà

Capu Seninu

A notte hè ghjunta nant’à Portu
Nant’à un mar’ culor’ d’acciaghju
Mi posu solu in lu me ortu
È in sognu partu in viaghju

Cum’è s’è ghjeru un acellu
Spiccu u volu versu la cima
Cù l’ale guasgi à tuccà celu
Per ritruvà la a mo rima

Scontru è salutu i Trè Signori
Nant’à la mo via cilesta
I centu rii cantadori
Fiume Spelunca à a so testa

Ancu s’è a nuttata hè pagna
Luntanu possu vede u molu
D’u portu chetu d’a Castagna
È alzu torna lu me volu

Versu à a torra nant’u scogliu
Aghju l’eternità vicinu
À passu lentu l’alba cogliu
Chì spunta in lu Capu Seninu

Accoglie mi

Viaghju in a cità à i muri rampali
U celu hè sempre azuru, u sognu hè sempre vivu
Sentu una manu dolce chì mi tocca la spalla
Mi dice : « veni à vede u to locu nativu »

A mo casa hè un tettu, ùn hè micca un palazzu
Ci stà una famiglia sempre più numarosa
Durmimu tutt’in tarra, ci cridimu in un stazzu
Vicinu à noi a mamma, canta una nanna è posa

A mane stemu chjosi in issa casa prigione
Chì a scola hè sarrata da omi militarii
Ùn sapemu parchè, ùn sapemu a ragione
Ma vulemu amparà in quessi lochi cari !

Cù tutt’i mo fratelli è cù e mo surelle
Parlemu di a vita ch’ellu ci hè in Auropa
Luntanu da a guerra, à luce di e stelle
È ci vulemu andà ùn emu u ventu in poppa

Ùn ti vogliu arrubbà a to tarra o fratellu
Ùn vogliu mancu più arrubbà le to voglie
Ma vogliu ch’è tù m’apri solu lu to purtellu
Chì risicheghju a morte s’è tù ùn mi voli accoglie

Ghjasminu

In la notte d’argentu, à luna urientale
Sopr’à un mondu accesu di cantu è di parfumi
Pianu a mo sunniata hà spartu le so ale
In l’orti i più fiuriti di millaie di lumi

Mi trovu in un giardinu sott’à un celu apertu
Ci vecu una zitella cù un mandile in capu
À l’ochji cristallini, funtana in u disertu
Aspettu d’ella un segnu, un gestu di a manu

Ma ùn cridia mancu ch’ella sapia e strade
D’un altru paradisu à l’ador’ di ghjasminu
Ma ùn sapia mancu ch’ella avia le chjave
D’una via di lume, è d’un novu caminu

Ind’è una timpesta mi porta in li so sensi
Risentu u so calore ch’ella piattava in sè
Cercu la so parolla à mezu à i silenzii
Ma si stà cheta è muta, ùn la possu sapè

È l’ora s’avvicina à l’affaccà d’i venti
D’ùn vede la mai più issa fata zitellina
Chì mi ghjaprò le porte d’un marcatu ridente
D’un oasì serenu à son’ di mandulina

Torna tù

Sè torna tù à dà mi fiatu
Per e canzone ancu di più
Per u calore chì m’ai datu
À dà mi fiatu sè torna tù

Torna tù in li mo sensi cù u to dolce prufumu
Torna tù in li silenzii, in le mo cantate sperse
Torna tù in lu mo core, in le mo idee perse
Torna tù in li mo fochi, a spera chì parte in fumu

Torna tù in l’attrachjate, in li lochi d’i mo passi
Torna tù in batachjate, in li venti d’u meziornu
Torna tù in u spuntà è in lu spegne d’u ghjornu
Torna tù in batticori, à fà l’anima strappà si

À u spuntà di a to vita

Sott’à l’albe prufumate
Porse da u mare mossu
Stese le to sponde amate
Nant’u me core cummossu

Cercu in li to fianchi accesi
Cum’è un stranu ricordu
Sortenu cum’è palesi
Di a chitarra l’accordi

À u spuntà d’a to vita
Sorgeranu i nostri versi
Di stesse forze addunite
È d’amore à cori persi

Accarezzaraghju i monti
Cù e to più alte sarre
Passaraghju li to ponti
Sulcaraghju le to strade

Duve u sole s’innamora
Guardaraghju da luntanu
Sopr’à l’onda a vechja torra
Chì veghja da u supranu

À chjosi ochji

Ti cuntaraghju a fola di bravi è di gattivi
Duve tutt’à a fine hè di chjaru è di bellu
Svegliaraghju i to sogni i più cari, i più vivi
Cum’è sparghje e so ale, nant’u mondu l’acellu

Ti cuntaraghju i fatti di a me zitillina
U sole rossu in fiara di a me ghjuventù
L’estati di culori ch’impanna la marina
È tutt’issi ricordi ch’ùn vultaranu più

Ti cuntaraghju a storia di quelli ch’anu fattu
I chjassi paisani ch’è t’ai da piglià
Per scumbatte l’inghjustu in quellu tempu mattu
Chì sguassa ciò chì l’anni ci anu vulsutu dà

Ti cuntaraghju i mei chì sò dinò i toi
T’amparaghju u passu da pudè ingrandà
Sempre tinendu à mente tutt’i to paisoli
Chì ti daranu a forza, u stintu per andà

Per a prima...

Per a prima ch’un ghjornu aghju tenutu cara
Per a strinta di sera, l’accordu di chitarra
Chì ci cacciò la pena in tempu d’incertezza
È ch’hè sempre presente à dacci una carezza

Per a prima canzona cumposta à lu to fiancu
Per quelle ch’aghju à fà, per lu me fogliu biancu
Ch’aspetta li penseri di un core infrebbatu
È i versi sinceri ch’ùn sò ancu invintati

Per a prima matina d’amore in i to bracci
Per issa dulcezza porsa è l’ira chì mi cacci
Per u mo primu sognu chì ti bramava à latu
Per a felicità chì sol’ tù m’ai data

Per a prima zitella, a prima ghjuvanotta
Ch’hà cruciatu u me sguardu è scuntratu i me ochji
Per tè chì faci mondu d’e nostre notte in lettu
È mi faci campà a vita prediletta

Stà la à sente

Solu nant’à la to strapunta
Fideghji u mare chì si stende
A luna hè spenta, u sole spunta
Incù e so frolle lucende

Ci campi quì, in tarra toia
Chì colma tutt’i to bisogni
Ti dà tuttu ciò ch’è tù voli
I to penseri è i to sogni

Ma stà la à sente chì ti chjama
À stà sott’i so tetti in coppi
Ma stà la à sente chì ti brama
À stà cun ella sempre in coppiu

Ùn ci hè più bella maraviglia
Quand’à l’albore i lumi bianchi
Chjamanu quellu chì s’esiglia
À riturnà à li so fianchi

Ma tù ch’in le so sponde stai
Per piacè ùn l’abbandunà
Chì più cà tutt’ognunu sai
Chì n’ùn pudarè cà vultà

Ma stà la à sente chì ti chjama
À stà sott’à i tetti in teghje
Ma stà la à sente chì ti brama
Per sempre e so tarre pruteghje

Da la so surgente...

Da la so surgente sicreta
Al di là di e sponde care
Duv’u piscadore à a reta
Di l’onde si ne face strade

Piattu trà a virdura scema
Di una machja inveranita
È centu grotte colme à gemma
Ci corre lestu à l’infinita

Seguidaraghju lu so passu
Finchè mi vularà purtà
Faraghju quindi lu me passu
S’ellu mi vole accumpagnà

In u silenziu d’i so fianchi
Ci pigliaraghju a mo certezza
In li so canti mai stanchi
Ci bagnaraghju a mo tristezza

Hè u so fondu d’acque scure
Cum’è in lu nostru l’internu
Ma fora hè tintu di primure
È vole corre per l’eternu

Seguidaraghju lu so corsu
Finchè mi vularà purtà
Scurdaraghju ogni tempu scorsu
Per versu u me avvene andà

In lochi soi

L’ete da lascià campà è ingrandà in lochi soi
Da chì possinu inventà i so lindumani novi
L’ete da lascià campà è ingrandà in lochi soi
Chì hè soiu issu paese, ne semu tutt’i figlioli

Ci volenu chjode e scole
Biutà li nostri paesi
Paghemu più ch’ellu ciole
L’impositu chì ci pese
Ùn ci hè guasgi più sperenza
In i cori à sicutera
L’omu hà persu la cuscenza
L’amicizia è a spartera

Colmi li ruminzulaghji
In l’isula paradisu
Parenu furmiculaghji
Scartafacciuli è mullizzu
Sò abbandunati i vechji
Cù a so magra pensione
Ùn batte più in li petti
A nostra antica passione

Anu li corpi feriti
È li cori certe donne
Sott’i colpi d’i mariti
O marturiate madonne
Spuntanu supermarcati
In le nostre le campagne
I ghjovani sò scappati
Ci ghjunghjenu stonde pagne

A nostra lingua si perde
Per quella d’un altru locu
Machje bionde è arbe verde
Sò brusgiate da u focu
In ogni reta suciale
Ci vanu l’infurmazione
Fughje la vita reale
Contr’à falze relazione

Carcu à soldi lu patrone
Cù i so biglietti in mane
U lascia senza ragione
L’impiegatu senza pane
A pianetta arruvinata
Da pulluzione è turmentu
A mo tarra scunsulata
Da custruzzione è cimentu

Forse un ghjornu l’alba chjara
Scumpiarà u scuru regnu
Di l’omi chì di a strada
Facenu scornu d’indegnu
Chì di u populu a forza
Più cà d’i putenti vale
Sò sicuru chì a mossa
Scumpiarà issi carnavali

Tantu chì a vita

Tantu chì a vita suminarà d’oru
I prati fiuriti d’estri cantadori
D’issa acquata dolce chì t’innacqua u visu
È ti face crede in un paradisu

Tantu chì a vita sarà prigiunera
D’un abbracciu falzu chì ci dà a spera
Ma ch’ellu pò ghjunghje a strinta fraterna
Da dacci u calore in cor’ di l’inguernu

Tantu chì a vita ti darà sperenze
È sperenze sceme ad ogni partenza
Chì ti strappa u core è ti taglia u fiatu
Chì s’aspetta in vanu un basgiu beatu

Tantu chì a vita sarà un battellu
Chì navica persu à mezu à e stelle
Chì l’umanu cecu cerca à tene in manu
Senza sapè mancu induv’elle vanu

Tantu chì a vita sarà mè è tè
Eiu a camparaghju per circà induv’hè
‘Ssu nidu d’amore, ‘ssa casa, ‘ssu agrottu
Tantu chì a vita sarà n’i to ochji

A.P.

Pensa à mè

Pensa à mè chì t’aspettu à u rossu di l’ora
U calore in lu pettu in u fretu d’u fora
Risponde o cara mea sò sott’à u balcone
Risponde à u mo versu è à e mo canzone

Pensa à mè chì cantu a canzona
Hè u mo versu sgalabatu
Ti bramaria à lu me latu
Per traccià la mo via
À lume è à sulia
Amore è benistà

Pensa à mè chì t’aspettu, da sott’à u purtellu
Per dà un altra vita à issu sognu zitellu
Risponde o cara mea sò sott’à u balcone
Risponde à u mo versu è à e mo canzone

Pensa à mè chì t’aspettu è cantu à strappavoce
Spergu di vede accende si u to visu dolce
Risponde o cara mea sò sott’à u balcone
Risponde à u mo versu è à e mo canzone

Litu

Di vintere o sullioni
Di timpeste o di calmane
Di serenu notte o ghjorni
È ancu di stonde arcane

D’ire o di serenità
Di canzone è di lumera
Di voce ch’anu à purtà
À l’albore a nostra spera

Litu di spartera è d´unione vera
Nidu d’accunsentu à chì vole sente
Litu di passione fà nasce canzone
Nidu di lamentu, richjara lu ventu

D’appacciate è di cunquiste
Di riflessi cristallini
Ghjente di quì o turisti
Mez’à l’onda smiraldina

D’ogni tempu è d’ogni stonda
Di rena a più calda è fine
Di battelli è di prufondu
À l’orlumare turchinu

À u ragiu d’u sole

À u ragiu d’u sole sarè accesa d’oru
È e ci cuntaremu e stonde d’un amore
Chì oghje n’ùn esiste, ma dumane pò nasce
À u ragiu d’u sole chì t’annega è ti fasce

À u ragiu d’u sole sunaremu l’accordi
D’una canzona nova nant’à e sei corde
D’una chitarra in brama d’invintà ci una storia
À u ragiu d’u sole ch’empie la mo memoria

À u ragiu d’u sole chì fala nant’e piane
Centu parolle care sussuraraghju pianu
Ind’è l’arechja toia d’ascultà impaziente
À u ragiu d’u sole chì t’accende, ridente

À u ragiu d’u sole chì cala è chì s’inchjina
Aspittaremu inseme ch’ella ghjunghji a matina
Nant’à i nostri sogni, l’astru maiò si ciotta
À u ragiu d’u sole, o quellu d’i to ochji...

Chitarra di vita

Cumpagna d’i mo passi è d’e mo incertezze
Hè sempre à u mo latu, m’hè fida è m’hè sincera
Quandu sfrisgiu e so corde, hè cum’una carezza
Un piacè infinitu chì scola cum’è cera

Cumpagna d’e mo stonde è di le mo paure
M’inventa nove strade, è novi lochi amati
Mi porta la lumera, mi scaccia la bughjura
Face tuccà l’eternu di virsura fatata

Cumpagna d’e mo notte è d’i mo ghjorni accesi
M’aiuta à campà l’ore, raligrà mi ognitantu
Conta u mare è e case, l’oru d’u mo paese
Accumpagna e parolle di tutti li me canti

Cumpagna d’a mo vita, ascosa in li me bracci
Chì d’una miludia, un mondu ne pò tesse
Mi trova qualche note in tuttu ciò ch’o facciu
Spartimu gioie è doli, l’inganni è e prumesse

Sè tù la me chitarra à sunà mi la vita
À truvà mi l’accordu è a serenità
Sè tù la me chitarra, a musica infinita
D’un paese chì fù è chì sempre sarà

U Tassu

Dopu avè pigliatu u chjassu
È a strada petricosa
Sbocchi in paese d’u Tassu
Ch’aspittava ùn sò parcosa
Ch’ellu ghjunghji lu to passu
À mezu à a machja ascosa

L’ai trova la to via
Da sott’à qualchi pullone
U frundame face umbria
À nant’à u muraglione
È u ventu cantarinu
L’impruviseghja canzone

U paese s’addurmenta
Focu mutu è fiara spenta
Ma u paese si move
In cerca di strade nove

Sò in manu d’u silenziu
E casuccie è a chjesola
Dop’à l’ultimu licenziu
U tempu fiume ci scola
O cum’u biotu hè immensu
O cum’a so tarra hè sola

I so tetti sò sfalati
In manu d’u lamaghjone
Cum’i so muri sfraiati
Ch’ùn cuntanu le staghjone
Soli soli abbandunati
Senza mancu una raghjone

A mo preghera

Ti cantaraghju a vita ch’accende i nostri forni
Da dacci u nostru pane, scaldà ci i nostri ghjorni
Quand’i u celu hè grisgiu è ch’ellu piove fora
D’invintà ci un sole da schjarì ogni ora

Ti cantaraghju i passi mei à mezu à l’umbria
Ma a ti truvaraghju a nostra nova via
Trà i fiori è a machja à l’adori muscanti
Ti daraghju per sempre a voce d’i mo canti

Cantaraghju l’amore ch’aghju per tè o cara
Chì face bella a vita è u mo core in fiara
Diciaraghju l’avvene cun tè è la mo spera
A canzona sarà la mo sola prighera

Quantu funu

Quantu funu le spese da difende una sorte
Per salvà lu un paese, chì risicheghja morte
Quantu funu li canti in le nostre memorie
Da cuntà gioie è stanti, pagine d’una storia

Da li libri sguassati di le nostre cuscenze
Eppo bugie ingrate da tumbà ci a sperenza
Scritte in le nostre petre, e stonde di l’infernu
Tutt’e nostre prighere da scunghjurà l’inguerni

L’attrachji nant’e sarre, un sole ch’imbriaca
E mente e più amare da u so raghju magu
È a spera di l’omu chì fideghja u dicoru
Chì li scarca ogni soma è li porghje un tisoru

Tante canzone à fà, tante parolle à scrive
Da pudè rinnuvà una lingua ch’hè viva
Aspittemu u mumentu di l’accolta ritrova
Di fà d’issi ramenti, i nostri passi novi

Oghje pruvemu à esse solu ciò ch’è no semu
Da issa tarra pussessi ci camparemu inseme
È s’è issu locu hè vechju, l’emu da rinnuvà
Chì ci semu parechji chì ci volenu stà !

Trà mare è monti

Trà mare è monti ci hè un locu
Ch’ognunu si vole appruprià
Ma questu locu ùn lu vi docu
Ch’hè quellu d’u mo sunnià

Ci sò rosse calanche
Eppo un’ onda d’ogliu
Una torra à pusà
À nant’un scogliu

Ci hè un vechju castellu
Trà e so machje piattu
Eppo a ghjente amica
À sparte un piattu

Ci sò case di petre
Culor’ di l’attrachjata
Una sciuma à a sponda
Maritata

Ci hè u fiume Spelunca
Chì corre da a foce
Chì face sente à tutti
La so voce

Ci sò pedi in marina
Eppo corpu in u monte
Trè Signori chì guardanu
I tramonti

Ci hè l’arinaghju calmu
U portu addurmintatu
U battellu à u molu
Apparechjatu

Una vita d’amore

Ci hè una casa à sparte, una funtana, un fornu
Un vechju addurmintatu ch’hà aspittatu tantu
Ch’ellu vultessi a ghjente cum’ellu torna u ghjornu
Quì l’hà campata sì una vita di stantu

Ci hè un fucone apartu nant’à u mondu d’oghje
È a notte s’accende da caccià ci ogni teme
I mei cù i toi ci anu addunitu e voglie
Quì l’hà campata sì una vita d’inseme

Ci hè un tettu di stelle, una sedia, un caffè
Per quellu chì ci vene, è chì pichja à a porta
Truvarà a so piazza per u sempre ind’è mè
Quì l’hà campata sì una vita d’accolta

Ci hè un paese vivu ch’aspetta una presenza
Chì ti vole è ti brama per mai pudè more
Chì crepa pocu à pocu ma chì t’hà a sperenza
Quì l’hà campata sì una vita d’amore

È s’è volti à campà per pudè lu succorre
Quì a camparà sì una vita d’amore

Mi n’andaraghju

Mi n’andaraghju ver di un locu di sogni
Induve ùn ci hè maestri ne patroni
Mi n’andaraghju duve mi purtaranu
U ventu frescu è sanu cù l’ambate in viaghju

Mi n’andaraghju à d’altri mondi accesi
Induve ùn ci hè più penseri difesi
Mi n’andaraghju duve l’ore sò feste
I nuli è e timpeste più n’ùn cunnosciaraghju

Mi n’andaraghju eppo aghju à vultà
Chì tuttu l’aghju avà in a mo tarra mamma
Mi n’andaraghju eppo aghju à vultà
È turnà à campà in Corsica chì chjama

Mi n’andaraghju ver di l’altre cunfine
Induve ùn ci hè ghjornu chì tocca à fine
Mi n’andaraghju à scopre d’altri abbroghi
È notte d’altri lochi cù ogni paisaghju

Mi n’andaraghju s’ellu ci n’hè fruntiere
À capu altu è le m’idee fiere
Mi n’andaraghju à custruì castellu
È cum’è da zitellu invintammi un maghju

Una stella in più

Lucente in lu celu scuru
Pare tuttu u to surrisu
Luminosa è accugliente
Chjara cum’è fior’d’alisu
Hè accesa tale un sole
Da u toiu u paradisu

Fermerà in lu me core
A to gioia di campà
À mezu à a to famiglia
Grande era u to benistà
Eri tù à core apartu
Chì dava senza cuntà

In lu celu di l’inguernu
Oghje sè partutu tù
Ai lasciatu à l’eternu
In celu, una stella in più
In core nostru, o Felì
Fermi è firmarè dinù

Lasci i toi in lu so pientu
I to amichi in dulore
Parti ver’ di l’altre sponde
Ch’hà indittatu u Signore
A vita cambia di latu
È u celu di culore

In a to tarra d’amore
Ripusarà la to salma
Ma vularà chjara è linda
À u celente, a to alma
Perdimu un esse di lume
Ma stà una stella calma

À aspittà ti

À l’ora calma di l’attrachju
Induve u cantu hè di spachju
Solu in lu fretu d’a sirata
Cù a mo mente innamurata
À aspittà ti

U sole ciotta, a notte cansa
E stelle si mettenu in mansa
Sott’à a volta spampillente
Stò à u sciuscettu accugliente
À aspittà ti

À aspittà ti torna à la luna d’argentu
U sole n’ùn ci hè più, aspettu ch’ellu torni
U focu di l’amore ma dimmi ch’ùn hè spentu
Aghju aspittatu tantu, e nuttate è i ghjorni

Ùn ci hè più nimu, u mondu hè viotu
Ùn ferma ch’u me cantu sodu
Da francà mi da ogni pientu
Quand’ùn ti vecu è ch’ùn ti sentu
À aspittà ti

Capicalatu ùn guardu più
E luce in lu celu quassù
È a mo vita à u ventu fughje
U mo sperà pianu si sdrughje
À aspittà ti

Tù chì sai

Tù chì sai u nostru cantu
È ch’ascolti u nostru versu
Fattine fiume tamantu
Da innacquà l’universu
Di canzone colme à gioie
Ind’u nostru mondu persu

Tù chì sai a nostra voce
Chì ribomba è chì ti chjama
À scurdà tutt’e to croce
È à seguidà issa brama
Di un populu addunitu
Falla luce torna a fiamma

Ripiglia a strada tracciata
Da l’antichi ch’ùn sò più
È di voce ch’ùn si sfiata
Canta la to ghjuventù

Tù chì sai a nostra tarra
Di muntagne è lochi d’oru
Chì tinimu tantu cara
Cum’è un bellu tisoru
Fà sventulà a bandera
Bianca cù testa d’u moru

Tù chì sai a nostra vita
Fatta di pene è di stantu
D’ardore ma d’addunita
È d’allegria ognitantu
Ùn ti scurdà d’un paese
Chì ti brama sempre tantu

I mo sentimenti

I mo sentimenti vanu
Cum’un ventu à briglia sciolta
Sbalancheghjanu ogni porta
È annuncianu u varanu
Dicenu in segnu di manu
A forza d’a nostra accolta

I mo sentimenti tonti
Francanu ogni cunfina
Da e sponde d’a marina
Sin’à l’altu di i monti
M’aiutanu à fà ponti
È à caccià ci ogni spina

I mo sentimenti sò
Strade nove da piglià
Ghjorni chjari à fà sbuccià
Tuntie senza raggiò
M’aprenu ogni purtò
D’una vita à sunnià

I mo sentimenti mondi
Ùn cunnoscenu stagione
Sò cum’è le mo canzone
Piscate in li me prufondi
Di u me core li fondi

Un mondu à fà

Benchè no siamu sfarenti
Cum’e nostre cundizione
Noi semu tutti parenti
È pudemu fà unione

Rispittendu le culture
È li populi in attesa
Femu ci una tessitura
Di e nostre mani tese

Semu d’a stessa pianetta
Tutti vulemu la pace
Eppo l’amicizia stretta
Per lu mondu chì si face

Vulemu chì li figlioli
Ingrandessinu d’amore
Ch’elli sianu i maglioli
D’un varanu à milli fiori

Ch’è tù sia neru o biancu
Ch’è tù sia corsu o nò
Eiu ti vogliu tene a fiancu
Per à issu mondu fà prò

Ch’è tù sia musulmanu
O cristianu o ghjudeu
Emu u stessu stintu umanu
Cose à sparte mè è tecu

U sensu

U sensu d’ascultà
Di capisce è ritene
È di sapelle amà
E parolle d’i toi
Traccià camini novi
Per u nostru l’avvene

U sensu d’ascultà
E canzone lasciate
D’una lingua chì sà
Ogni tempu ogni stantu
À e labbre u cantu
Di e staghjone andate

U sensu d’ascultà
L’essenza di stu locu
Chì ti vole parlà
Ma chì spessu ùn ascolti
Tutt’issi versi sciolti
À brusgià cum’un focu

U sensu d’ascultà
U vechju è u zitellu
Da pudè amparà
È per cun elli sparte
Di a nostra alma e parte
È fà ci ne un castellu