I to ricordi accumbracciati
À i to sogni à inventà
È ‘ssi surrisi innamurati
À coglie un altru duvintà
Hè a to vita chì ci corre
Nant’à lu grande è bellu andà
È pocu t’impremmenu l’ore
S’elle ti facenu vultà
T’aspetteranu l’ore aparte
À l’orli di u to campà
Camparè e stonde d’u parte
Ti faranu dinò vultà
In core splendenu i ghjorni
Ancu s’ella piglia l’età
È e partenze è i ritorni
Anu sulcatu u to sperà
Ma a to voce di rinnovi
Hà sempre un versu per andà
È ciò ch’è tù perdi, u ritrovi
Vicinu à ‘ssu tempu chì và
Aucun commentaire:
Enregistrer un commentaire