Cantu per tè chì sè partuta

In l’aria pura d’i mo anni
In lu so stranu passa è veni
Duve sò i ghjorni sereni
Duve sò i to lindumani
À piglià u core è e mani
In l’aria pura d’i mo anni

E mo paure sò svanite
Quandu m’ascondu è mi rifughju
In li to bracci, lasciu u bughju
Di l’amarezze è d’e ferite
Quandu ‘sse stonde sò finite
E mo paure sò svanite

Luntanu u sentu u so rumore
A mandulina à trimulella
Batte in lu pettu di l’acella
U core chì chere l’amore
Senza l’angoscia è u timore
Luntanu u sentu u so rumore

Cantu per tè chì sè partuta
Al di là d’e mille cunfine
Duve u ghjornu ùn tocca fine
È a tristezza si stà muta
Ùn trovu più l’ora vulsuta
Cantu per tè chì sè partuta