Nant’i scoglii di Bussaghja
Sò centu è centu e sciumare
À invadisce tutt’a piaghja
Quand’ùn hè serenu u mare
Correnu cum’è muntoni
À lu ventu, e sciume amare
U celu si face grisgiu
Ùn si vede più a costa
Sopr’à l’onde ballulente
A torra ci hè sempre posta
À fighjulà l’orizonte
È u battellu ch’accosta
Viaghjemu, u vintulellu
Face ballà la to crina
Sott’à l’ambata chì corre
Hè in festa la marina
Pare finitu lu caldu
Ancu compia l’istatina
Mi pare un sognu stranu
Di rivede ti amore
Di sta timpesta forta
Sentu sempre lu rimore
È la to voce chì move
È attrista lu me core
Hè timpesta o la me cara
Hè spiccatu u nostru amore
Hè par sempre annigatu
In l’onde avà in furore
Hè par sempre annigatu
In lu mare d´u me core
Antoine Parodin
Ghjovi u 23 d’Aostu
Aiacciu
Aucun commentaire:
Enregistrer un commentaire