Bloggu ingiru à i puemi in lingua corsa d’Antoine Parodin. Mandate puru u vostru avvisu in cummenti ! Bon’ viaghju in issi sogni scritti !
vendredi 17 août 2018
Sirinata addulurata
Vogliu cantà per tè, mi lasci ùn sò perchè
O cara preferita
Avanzu in a nuttata cù l’alma addulurata
Cusì trista è ferita
Ti cantu sti canzoni chì sempre in li to sogni
Volenu risunà
È lu core chì batte, la me mente chì schiatte
U filu sunnià
S’empie tutt’a mo vita di tristezza infinita
Sott’à lu to balcone
A luna à pianghjulà è in celu culà
L’estru d’a mo passione
More lu ghjornu senza fà tace quella assenza
Chì a pena sumena
Ed in sta calma notti, lucenu li to ochji
Cù la luna serena
Si mischja lu mio cantu à l’acqua quì accantu
Chì corre in la funtana
Po scappa lu mio pientu in murmuru di ventu
Sciroccu o tramuntana
A puesia hè persa in quella alma spapersa
Chì cerca lu riposu
A rima s’alluntana à lu son’ di campana
Nant’u raportu posu
Antoine Parodin
Inscription à :
Publier les commentaires (Atom)
Aucun commentaire:
Enregistrer un commentaire